Our Story
It is a long established fact that a reade.
“بالسعي والاجتهاد والعلم يرتقي الانسان”
من أنا
هاخد من وقتك دقايق ... انا المهندس محمد مصطفي علي ... مهندس كهرباء قوي ... من صغري وانا بحب المجال ده جدا و نفسي أضيف ليه قيمة ... دخلت الجامعة زي اي مهندس بيحلم بمستقبل وردي وجميل و احلامه ملهاش سقف وطموحه يملي كل العالم ... وبدأت اثناء الكلية انزل مواقع واتدرب في الاجازة وبدأت اشوف حاجات جديدة واقابل ناس جديدة ... بس للأسف زيي زي اي مهندس السنين خدتني وايام الكلية الجميلة عدت واتفاجئت اني بدأت حياه جديدة ...حياه مليانه بالمسئوليات والتحديات ... مكدبش عليكم كان كل هدفي اشتغل زي اي مهندس بيبقي لسه متخرج ونفسه يشتغل ... وبالفعل اشتغلت اول شغل ليا في شركة صغيرة جدا كان مجالها في انظمة التيار الخفيف (انذار الحريق - كاميرات المراقبة انظمة الصوتيات -- ... الي اخره) وكان مرتبها قليل جدا ... قولت لنفسي مش مشكلة اهو اديني بشتغل وبلم خبره وبعدين اتعب دلوقتي عشان تكسب بعدين ... بدأت التحدي مع نفسي وكان وقتها مفيش مصادر نتعلم منها ... كانت المعلومة بتيجي بصعوبة ... اجتهدت و اتعلمت بفضل الله اللي قدرت عليه من الشركة دي ووقتها قامت ثورة يناير والوضع مكانش مستقر نسبيا ... قررت ساعتها اني اسيب الشغل واتنقل مكان تاني عشان اتعلم واكتسب خبرات اكبر وكمان مكدبش عليكوا كنت برده عايز مرتب اكبر .... لاني وقتها كنت بفكر في الارتباط ... وقتها اتنقلت شركة من شركات المقاولات الكبيرة جدا ولكن قديمة جدا ... يعني من الشركات بتاعت زماااااان ...موظفين ... حضور وانصراف وبطيخة وجرنال .... وحرفيا قعدت سنه تقريبا مش بعمل حاجة غير اني اتحولت موظف وللاسف كنت متعين في قسم المعدات ... اوناش ولوادر و عربيات (بعيدة عن مجالي خالص) ... وبدأت دوامة الحياه تاخدني زي اي حد ... ودخلت طبعا مرحلة الزواج السعيد ... والحياه برده زودت مسئولياتها عليا ... وبعد سنه تقريبا اتنقلت قسم تاني في الشركة ولحسن حظي كان مدير القسم بيطلع معاش وقتها وللامانه رئيس مجلس الادراة قال نعين المهندس محمد يمسك القسم (ماهو مكنش فيه غيري هههه) بدل ما نجيب حد من بره ... كان القسم ده قسم المقاولات الكهربية ... قولت لنفسي تمام ياللا بقي اثبت نفسك ... واشتغلت واجتهدت جدا بس كان فيه مشكلة صغيرة ... هي اني مكنتش بتعلم كل حاجة صح ... يعني زي اي حد يقولك انزل الموقع وهتتعلم ... طيب هتعلم من مين وايه ...كنت بتعلم من اي حد حرفيا كان بيقابلني سواء فني او مشرف ... بس بعد فترة من الشغل تقريبا سنه كمان ... بدأت افكر في اللي كل المهندسين بيفكروا فيه ................ السفر للسعودية ................... كان وقتها عندي بنتي تقريبا سنه ونصف وانا كان نفسي اسافر واخوض التجربة وفعلا بدأت ادور علي اعلانات توظيف وقدمت في اكتر من مكان علي امل السنارة تغمز واسافر بقي واجمع الملايين وارجع معايا الاجهزة الكهربائية والانسر ماشين والحاجات الحلوه بقي بتاعت الخليج ... بعد اسبوع تقريبا جالي تليفون من احدي شركات التوظيف بيبلغني ان فيه ميعاد مقابلة للسفر للسعودية ... كنت فرحان جدا وقتها ...ههههههههه ... روحت في الميعاد وقابلت اصناف كتير من المهندسين البائسين زيي وقتها ومرصوصين بره في استقبال الشركة علي امل اجتياز المقابلة والسفر ... فضلت قاعد 5 ساعات وجنابه قاعد جوه بيبيع ويشتري فينا بمزاجنا بس كان علي قلبنا زي العسل وقتها ... ولقيت فيه مهندسين قدامي بيكتبوا علي الابلكيشن بتاع التوظيف ... اقبل بأي مرتب ... الجملة دي صدمتني للدرجادي سعرنا وصل لكده ... دخلت المقابلة والحمد لله كنت من المقبولين و براتب كويس كمان ودي كانت مفاجأه بالنسبالي ... تم اختيار 4 مهندسين يومها من اصل عشرات المهندسين المتكدسين في استقبال الشركة ... وبالفعل روحت قدمت استقالتي من شركة المقاولات العتيقة وجهزت اوراقي وشنطتي وبدأت رحلة جديدة وتحدي جديد ... كانت اصعب لحظة مرت عليا في حياتي ... لحظة الفراق ... ايوه فراق الاهل والزوجة والابنه والاصحاب و الشوارع ... بس قولت لنفسي استحمل يابطل بينك وبين الملايين كام شهر .... هههههههههه ... توكلت علي الله وسافرت وكلي خوف وحيره وقلق و حماس واحاسيس كتير متلغبطه جوايا ... اول ما نزلت من الطيارة بدأ كل ده يتلاشي وبدأت اقول لنفسي انت قدها .... ياللا يا بطل ... وقابلت وقتها السواق الخاص بالشركة اللي كان واقف مستنيني بيافطة عليها اسمي ... بدأت رحلة جديدة في الشركة دي ... وهي فعلا كانت شركة كبيرة ... بس للأسف مفيش نظام وده اللي انا كنت خايف منه ... مرت الايام والمفترض اني كنت رايح اشتغل مهندس موقع لقيت نفسي شغال مهندس مكتب فني .... وماله ... مش مشكلة اديني شغال .... كان مدير الكهرباء هندي جميل ... تقريبا كان بيطلب مني نفس الشغل بس بطرق مختلفه ... يعني مره يطلب حصر الشغل من علي اللوحات المطبوعة ... وبعد يومين يطلب نفس الشغل بس من علي الاوتوكاد .... وبعد كده يطلب نفس الشغل مع اضافة لمسات ملهاش اي لازمه ..... ههههههههه ... كنت شغال الحمد لله وبنفذ المطلوب مني بكفاءة ... لحد ما في يوم لقيت مدير الشركة (اللي عمل معايا مقابلة في مصر) ندهلي وقاللي ان فيه رسومات شوب دروينج مطلوبة ... انا عملت حواجبي تمانية ومش فاهم هو ليه بيطلب مني انا كده ... انا المفروض جاي مهندس موقع ... قولتله والله يا هندسة مش بعرف اعمله ... رد عليا رد غيرلي كل تفكيري وطريقي ...قاللي هو فيه مهندس مبيعرفش يرسم شوب دروينج ... بصراحة فكرت في الجملة كتير جدا ... وبدون الدخول في تفاصيل اكتر كملت فترة قصيرة في السعودية ونزلت بس كانت كلمته بترن في ودني .... ومن هنا كانت البداية ... 2015 ... نزلت مصر وقعدت ادور في كل الداتا اللي موجودة والكورسات المتاحة عشان اتعلم الشوب دروينج ده ... وبفضل الله اتعلمت وبدأت اتطور من نفسي وكنت وقتها اشتغلت في مكتب استشاري كبير في مصر ... وبصراحة دا ساعدني كتير اتعلم وازود خبرتي ... واخدت قرار مع نفسي اني لازم انشر العلم ده ولازم كل المهندسين فعلا يعرفوا قيمة العلم ... انا لحد الآن بتعلم كل جديد ويوم ما ابطل اتعلم هكون ميت اكيد ... دا شعاري ... وبفضل الله حاضرت كورسات بجانب شغلي ... مكنتش بنام الليل ... تحضيرات وتجهيزات للكورسات واقوم الصبح اروح الشغل .... ولحد الوقت اللي انا بكتب فيه الكلام ده انا قررت اني احاول اغير العالم اللي حواليا ولو بشئ بسيط ... انت كمان قادر تغير الدنيا حواليك المهم تغير تفكيرك ...
ما هي اهدافي
- الارتقاء بقيمة ومكانة الهندسة في كافة المجالات
- توصيل المعلومات بشكل مبسط وسهل
- توثيق المعلومات ونشر العلم
